خرجت الإعلامية رضوى الشربيني، للرد على الجدل الذي أثير خلال الأيام الماضية، بعد حلقة فسخ الخطوبة إيمان واحمد، والتي تمت في برنامجها هي وبس، على شاشة dmc، للصلح بينهما وزواجهما، وبعدها أدعت الفتاة أن الحلقة مفبركة.
رضوى الشربيني ترد على جدل حلقة أحمد وإيمان
وتحدث الإعلامية رضوى الشربيني، وفقا لما رصده موقع تحيا مصر، في لايف عبر صفحتها الرسمية على موقع التواصل الاجتماعي فيسبوك: وجب التوضيح للناس اللي بيحبوني وبيدعموني ووجب التوضيح للرأي العام وكل من يهمه عن حلقة ايمان وأحمد اللي هو بعت للإعداد عن مشكلة بينه وبين خطيبته والحاجة الوحيدة اللي هتخليهم يقربوا هو وجودهم في البرنامج.
وتابعت: حوالي 4 أطراف من الاعداد كلموا احمد وإيمان وهما الاتنين قالوا إنهم مخطوبين وأحمد قال عايزة اصالح خطيبتي عندكوا وكل القصص اللي بتيجي البرنامج بتمضي على ورقة، وحضرتك ماضية أن أثناء الحلقة كل لفته بتعمليه مسجلة ومصورة، يعني حضرتك متفاجئتيش وأنا ماسكة الكارت وبقولك الأسئلة والكاميرا اتفتحت لأنك ماضية على ورق، ومن ضمن الإقرار المسؤولية عن كافية التصريحات ووجهة النظر الخاصة دون أدنى مسؤولية على إنتاج وإدارة القناة ومسؤولية كاملة عن كل قول أو فعل يصدر خلال تصوير الحلقة، يعني أنتي ماضية أن كل حركة ولفتة خلال الحلقة أنتي مسؤولة عنها يا أستاذة إيمان، أنتي بعتي لينا بطاقة أنك آنسة مش مطلقة، وجب التوضيح للرأي العام والجمهور ولكل من يهمه الأمر، عن حلقة إيمان وأحمد.
رضوى الشربيني: هأخد إجراء قانوني بسبب الإشهار اللي حصل
وأضافت رضوى الشربيني: هيكون في تحرك قانوني من ناحيتي، بعد التشهير وإثارة الجدل والبلبلة بهذا الشكل أنا هروح للقضاء والقضاء هيجبلي حقي، لكل المحبين والكارهين، هذا ما حدث بشهادة الشهود بالتسجيلات الصوتية والرسائل، الكواليس موجود وكل شيء موجود هيتم دلوقتي أنا هتحرك قضائيًا علشان القانون يجبلي حقي بجد معرفش انتي عملتي كده ليه.
رضوى الشربيني: انتي مش عدوة ليا وبعتلنا ان الحلقة مكسرة الدنيا
واستكملت رضوى الشربيني: القصة قصتك والحكاية حكايتك، وخطيبك اللي طلب يستعين بينا علشان تتصالحوا على بعض، أنا معرفش أنتي عملتي كده ليه وأنتي بالنسبة ليا مش عدو، أنتي تعلمي أن بعد ما الحلقة اتعرضت بعتي لفريق الإعداد أن الحلقة كسرت الدنيا وطالعة تريند، وفريق الإعداد قالك أنهم كانوا نفسهم يصلحوا، وحضرتك بعتي لأستاذ أحمد ووالدته يتقدموا للقضاء لأنك مكنتش عارفة أننا بنسجل وأنتي كنتي عارفة أننا بنسجل.. أنتي عارفة أنتي قلتي إيه على والدة أستاذ أحمد وللأسف متشالش وفي شهود عيان أن أنتي قولتي لو والدته ثابتة على موقفها أنا هفسخ والشيخ وخطيبك شهدوا بـ ده”.
